Gott mál, en..... Friðrik?

Hvaða gagn er að því að auka þorskkvóta í kreppuástandi eins og nú ríkir um allan hinn vestræna heim? Sölutregða ríkir og eftirspurn á undanhaldi, þrýstingur á verðlækkun afurða, markaðurinn að leita í ódýrari afurðir. Kaupendamarkaður í uppsiglingu með tilheyrandi auknum kröfum um meiri gæði og tilheyrandi gæðakvörtunum til verðlækkunar. Alþekkt fyrirbrigði í kaupendamarkaði þar sem framboð er meira en eftirspurn. Það væri glapræði að auka framboð í sliku umhverfi og algjör fásinna. Við myndum veiða meira til að selja á lægra verði. Ávinningur; enginn!! Þetta er því algjört bull og hugsanavilla hjá LÍÚ. Til hvaða ráða eru OPEC-ríkin nú að grípa til? Auka framleiðslu?? Menn verða að vita hvar þeir stiga niður þegar þeir lyfta fætinum upp til að taka skref.

Bíðum rólegir, slöppum af, Leyfum þorskstofninum að vaxa enn frekar og dafna (ef hann getur þrátt fyrir og v/fæðuskorts) á meðan þetta ástand ríkir og setjum svo allt á fullt þegar tækifærið kemur. Hefjum frekar stórsókn gegn hvölum og selum og öllum öðrum afætum sem hefta vöxt þorskstofnsins, (ásamt mjög svo hófstilltum veiðum mannsins) og bíðum færis. Hefja hvalveiðar strax! Stórfelldar! Á öllum stofnum sem til næst! Þetta  eru skelfileg rándýr sem stunda skelfilega rányrkju. Óhefta. Þar er enginn kvóti. Hafið þið séð þessar skepnur undirbúa árás á fiskitorfur? Óhugnanlegt! Að friða þau eru alvarleg mistök á meðan hefðbundnar veiðar eru stundaðar á öðrum nytjastofnum. (Sama á reyndar við um refinn á Ströndum.) Skelfileg mistök misviturra manna með enn skelfilegri afleiðingum. Alvarleg röskun i náttúrunni. 

Ég er þér alveg sammála Friðrik, að það séu jákvæðar fréttir að þorskstofninn sé loksins að rétta úr kútnum og og vonandi er það raunverulegt. Ég er þér hinsvegar algjörlega ósammála, að nú eigi þegar í stað að taka þann hugsanlega ávinning og slátra honum í hvelli, engum til hagsbóta nema kanski örfáum tækifærissinnuðum einstaklingum innan LÍÚ. Er reyndar alveg hissa á því að þú og LÍÚ skulið leggja þetta til. Hvað eigum við, sem kaupum af ykkur fiskinn að gera við afurðirnar af þessum 30.000 tonnum þegar við erum þegar í vandræðum með að selja þær afurðir sem við erum að framleiða í dag. Svaraðu því fyrst áður en þú ferð lengra. Nei Friðrik. Í upphafi skyldi endirinn skoða. Ég skora á sjávarútvegsráðherra og skoða vandlega kosti, galla og framtíðarmöguleika áður en hann ákveður hvað gera skal.

Séum við hinsvegar að fara að afhenda ESB þessa auðlind skiptir þetta engu máli að mínu mati og kanski best að útrýma fiskistofnum á Íslandsmiðum áður en það verður því eftir það verður hvort eð er enginn íslenskur fiskiðnaður stundaður  í landinu, Samfylkingunni og ónýtri ASÍ-forystunni vonandi til óblandinnar ánægju.

Höfundur er Fiskvinnslumaður, Vinnslustjórnandi, Rekstrarstjóri fiskvinnslu.

 

„Mjög jákvæðar fréttir“

Til hamingju FH!!

Ég verð  að játa að það gleður mitt gamla FH hjarta að horfa á þessa stráklinga vinna sigurreyfa Haukana aftur með einu marki. Sýnir að fyrri sigurinn var engin heppnissigur. Sýnir líka að þið eruð bestir núna.  Vonandi farið þið alla leið FH-ingar og vinnið svo deildina líka. Loksins, loksins er stund FH runninn upp eftir langt hlé, alltof langt að mínu mati. Munið að hjá ykkur liggur vagga handboltans á Íslandi. Enn og aftur, til hamingju með sigurinn. Áfram FH!!!!

FH komið í undanúrslit

Landsliðið?

Hvað skyldi það falla um mörg sæti ef það tapar fyrir Möltu?

Heiðar tryggði Íslandi sigur á Möltu

Hvernig er þetta hægt??

Hvernig fara nokkrir menn á smáskeljum, eins og sjást á þessari mynd og sagðir eru bátar sjóræningjanna, að því að; komast um borð, yfirbuga fjölmennar skipshafnir, og síðan yfirtaka skipið og sigla því þangað sem þeim dettur í hug? og hvar eru skipin 17 sem þeir hafa í gíslingu geymd á meðan samningar um lausnargjald standa yfir? Maður gæti skilið að þetta væri hægt á öflugum hraðskreiðum fallbyssuskipum með hótunum um að skjóta, en á smátrillum er magnað. Þetta verður upplagt fyrir sjómenn okkar í framtíðinni þegar ESB-aðild verður búin að gera þá atvinnulausa og siglingaleiðin um Norðuríshafið hefur opnast. Allar siglingaleiðir milli austurs og vesturs verða þá um íslenska lögsögu. Þeir hafa þó yfir öflugum "hraðfiskibátum" að ráða sem lítið mál verður að vopna svo sem eins og einum sæmilegum hólk og nokkrum léttari, ha! Þið framámenn sjómannasamtaka Íslands. Senda strax menn þarna niðureftir í æfingabúðir.

Baksvið: Hverjir eru sómölsku sjóræningjarnir?

Hverju er verið að verjast?

Mér finnst þessir varnarsamningar við aðrar þjóðir einhvernveginn algjört bull. Þær eiga að koma hérna annað slagið til þess, að því er virðist, láta einhverja vita að landið sé ekki varnarlaust. Hverjum er verið að senda þessi skilaboð? Á hverju eiga menn von ef þetta tilgangslausa varnarflug verður afnumið? Þetta er eins og lögreglan á Ísafirði skreppi á t.d. Þingeyri svona einu sinni í mánuði eða svo til að athuga hvort þar sé ekki allt með friði og spekt og kanski senda þau skilaboð til hugsanlegra óróaseggja að þeir séu nú hugsanlega til staðar ef þeir verði með eitthvað múður. Nú eða löggan á Sellfossi færi á Stokkseyri eða löggan á Húsavík birtist á Kópaskeri. Furðulegt!

Hvaða hætta stafar að Íslandi ef enginn slíkur varnarsamningur er til staðar? Hverjir myndu hugsanlega notfæra sér það ástand? Erum við ekki í Nato og hvað myndi gerast ef ráðist yrði á landi í skjóli þess að það er varnarlaust? Hverjir eru líklegastir? Rússar? Kína? Japan? Arabarnir?

 Nei, eins og staðan er núna eru það líklegast þeir sem nú eiga að sjá um varnirnar. Hlægilegt! Gefum okkur samt að einhver þjóð vildi nú nýta sér ástandið, t.d. Rússar sem vildu kanski hreiðra um sig hérna í miðju Natoveldinu, þrátt fyrir að hafa yfirlýst það á góðum degi að þetta sker væri til einskis nýtanlegt nema sem fanganýlenda. Hvað myndu Bretarnir og Nato gera þá? Láta það bara afskiptalaust af því að þeir væru ekki með neinn varnarsamning við Ísland? Ætli það. Ætli ofsóknarbrjálaðir Kanar og Bretar myndu ekki bregðast hart við, hvort sem um einhvern varnarsamning væri að ræða eða ekki.

Hættum þessu bulli og vænisýki, segjum þessum varnarsamningum upp, ekki bara við Bretana heldur öllum samningum og harðbönnum Bretum að koma inn í íslenska loft og landhelgi með hernaðartól sín. Við ættum svo líka að segja okkur úr Nato (hélt að ég ætti aldrei eftir að segja þetta) eftir að Bretar, Natosamherjar okkar settu á okkur hryðjuverkalög án þess að aðrar Natoþjóðir sæu nokkuð athugavert við það og jafnvel fundist það alveg eðlilegt og réttlætanlegt.

 Hvað erum við eiginlega að gera í þessu hernaðarbandalagi nú þegar engin skynsamleg ástæða virðist fyrir því? Hvað höfum við haft upp úr því? Hvað gerði Nato þegar Bretar fóru aftur og aftur í stríð við okkur með einn öflugasta flota í heimi? Komu þeir okkur til aðstoðar? Nei. Enn og aftur þótti það allt í lagi að þeir réðust á örþjóðina litlu með herskipaflota til að verja vonlausan málstað, enda töpuðu þeir þeim stríðum án þess að vinna eina einustu orrustu. Það held ég að sé geymt en ekki gleymt í Bretlandi að litla Ísland er eina landið í heiminum sem Breta hafa tapað stríði við á 20. öldinni. Og nú geysar enn eitt stríðið milli þessara þjóða þar sem Bretar hafa gripið til þess ráðs að virkja allt sem þeir geta virkjað gegn okkur, ESB-evrópu, BNA og Nato til þess að reyna að koma í veg fyrir að þeir tapi enn einu stríðinu gegn okkur. Því segi ég; Úrsögn úr Nato og aldrei í ESB. Íslandi stafar engin ógn af því að vera án einhverra málamyndar varnarsamninga við aðrar Nato þjóðir. Þær eru aðeins leika sér og láta okkur borga fyrir þann leikaraskap.

Á báðum þessum vígstöðvum eigum við einfaldlega alltof marga fjandmenn og alltof fá vini til að geta nokkurntíma átt með þeim samleið í einhverju bandalagi hverju nafni svo sem það nefnist. Nýjasta og skýrasta dæmið er svo auðvitað féttirnar í morgun um þvingunaraðgerðir vegna Icesave og baktjaldaplott ESB um gerðardóm gegn Íslandi sem fjalla ætti um Icesave og neyðarlög og aðgerðir ríkisstjórnar Íslands. Er það ekki íhlutun um innanríkismál sjálfstæðs og fullvalda ríkis sem Ísland telst ennþá vera hvað sem síðar verður. Gírugir og gráðugir ESB forkólfarnir eru kanski farnir að karpa um það eða búnir að ákveða hvernig á að skipta upp auðlindunum þegar þeir hafa tekið landið upp í skuld eftir að hafa fyrirskipað gjaldþrotið með því að hafna láni. Hvað vitum við?

 

 

Kyssir ekki á vönd kvalaranna

Hvað gerðu þeir til að uppskera það?

Skyldi það vera vegna árangurs stelpnanna okkar?

Ísland tekur stórt stökk upp á við

Hvar er Samfylkingin?

Það er og hefur verið með ólíkindum að fylgjast með viðbrögðum Samfó-þingmanna og ráðherra í öllu því gjörningaveðri sem riðið hefur yfir þessa  þjóð undanfaranar vikur. Þeir virðast týndir í öllum látunum og hafi sést eitthvað til þeirra hefur verið ómögulegt að átta sig á því hvort þeir eru í ríkisstjórn eða stjórnarandstöðu, eða hvorugt. Undanfarið hefur manni fundist að annar sjórnarflokkurinn standi og taki á sig holskeflurnar en hinn er á harðahlaupum frá vandanum og reynir að bjarga eigin skinni. Þingmenn koma í ræðustól á Alþingi og fyrrum þingmenn á torgum úti og mótmæla öllu því sem verið er að gera til björgunar. Nú virðast þeir telja að rétti tíminn sé til að skríða í skotgrafir og fela sig. Og þessi síðasta uppákoma, að neita að bera ábyrgð er lýsandi dæmi um dugleysi og ráðaleysi þessa söfnuðar sem Samfylkingin er. Það eina sem hún hefur til málanna að leggja núna er að gefast upp og biðla bara til Evrópubandalags um að taka við og fá evru. Heldur þetta fólk að það geti bjargað okkur út úr glörningaveðrinu? Er þetta rétta tímasetningin fyrir þá umræðu? Fráleitt. Hvernig væri nú að þessi auma hjörð færi nú að axli sína ábyrgð og reyna að takast á við vandann af einhverju viti, eða er ekkert vit í þessum flokki. Hann er jú í ríkisstjórn og ber fulla samábyrgð á því hvernig komið er. Það að ætla að varpa ábyrgðinni á einn mann og taka síðan ekki ábyrgð á honum er fáránlegt, ekki síst í ljósi þess að hann er starfsmaður ríkisstjórnarinnar, en ekki ríki í ríkinu. Hafi hann komist upp með að valda öllum þeim skaða sem orðinn er hefur ríkisstjórnin brugðist og Samfó þar með. Davíð Oddson er einn af 3 bankastjórum SÍ  sem síðan starfar í umboði ríkisstjórnar, er það ekki eða er ég eitthvað að misskilja þetta. Er þetta kanski öfugt? DO er alráður yfir SÍ og styrir Stjórn bankans og ríkisstjórn? Ef svo er, hvað erum við þá að gera með ríkisstjórn?  Ég er að vísu ekki sérfróður um stjórnarskipulag SÍ en hef alltaf staðið í þeirri meiningu að hann sé verkfæri  ríkisstjórna til að stýra fjármálakerfi þjóðarinnar en ekki öfugt. Þýðir; ríkistjórnin samþykkir lántöku og skilmála hjá IMF (ekki SÍ og DO) þar með talin ISG sem ráðherra, SÍ framkvæmir skilmálana, þar með talið, hækkun stýrivaxta. Sú ákvörðun varð ekki bara til í höfði DO er það? Var það DO sem tók lánið og skipaði ríkisstjórninni að skrifa upp á víxilinn og skilmálana. Hættum þessum fáránlegu nornaveiðum, Styðjum við bakið á þeim sem eru að reyna að  koma skútunni út úr gjörningaveðrinu og skoðum síðan þegar komið er í höfn hvort ástæða sé til að skipta um áhöfn, eða afhenda skipið nýjum eigendum. Gleymum þó ekki að Samfylkingin var í áhöfninni og meira að segja í brúnni ásamt Sjálfstæðisflokknum en virðist hafa hlaupið frá borði, yfirgefið skipið á hættustund. Er skynsamlegt að setja traust sitt á slíka í framtíðinni?

Samfylking afneitar Davíð

Hamilton í góðum gír.

Þetta var flott hjá hjá honum og viðbúið. Vonandi verður það svona sem oftast í sumar. Athygli vekur hvað BMW bílarnir virðast vera sprækir og Kubica heldur áfram að gera það gott. Það skyldi þó ekki vera að þeir væru að stinga sér fram fyrir Ferrari til frambúðar? Hvað segja Ferrari-áhangendur sem sumir hverjir hafa haldið fram að Ferrari sé eina liðið sem geti smíðað alvöru bíl og hinir séu bara með lélegar eftirlíkingar. Það heyrist bara ekki múkk í þeim núna. Kimi kallinn bara í veseni með Fákinn fráa. Ég á nú samt von á honum upp í stigasæti ef druslan hangir saman, en hann hefur alltaf verið talinn böðull á bílana og taka allt út úr þeim sem hægt er og helst aðeins meira. Það hefur lengst af staðið honum fyrir þrifum að hann stútar alltaf bílunum. Hafi bíllinn dugað heila keppni þá var Kimi á pallinum en ansi oft fór hann bara labbandi heim. Alla vega verður það að viðurkennast að McLaren gat ekki smíðað bíl sem dugði honum meira en hálfa keppnina. Og nú er hinn óbilandi Ferrrari farinn að gefa sig í höndunum á honum. Gaman verður að fylgjast með Kubica slást við Hamilton á morgun og ekki síður Kovalainen slást við að halda Massa í skefjum. Og koma svo McLaren!!!

Hamilton á ráspól en meistarar byrja aftarlega

Hvað nú?

Hvað segið þið Man.Utd - menn? Hvernig fer þetta? Mun fórnarkostnaðurinn í leiknum gegn M.Borrow skila sér í þessum leik? Ef okkar menn ætla sér lengra í þessari keppni verða þeir að vinna öruggan sigur í þessum leik. 2-3 mörk og  aðallega, halda hreinu. Ef spá þín á að ganga eftir Sófús Árni Hafsteinsson verður það að ganga eftir. Hef hinsvegar ekki trú á minum mönnum í þessari orrustu og held að þeir tapi henni. Reyni gjarnan að vera raunsær og standa í báða fætur á jörðinni. Það kallast víst að vera jarðbundinn. Vona þó að þú hafir rétt fyrir þér og Man.Utd verði í baráttunni á öllum sviðum... og vinni þrefalt - aftur. Verður þá Ferguson gamli aðlaður aftur?  Og þá hvað? Sem yfir-Sir í hinu guðsvolaða, fyrrum stórveldi, Englandi sem getur nú ekkert í fótbolta án fótboltamanna frá öðrum þjóðum og þar á meðal litla Íslandi. Spyr sá sem sem ekkert veit.

Ferdinand ekki með gegn AC Milan

Búið mál.

Þar glutruðu Man Utd. niður forystunni og þar með tækifærinu til að verða meistarar. Nú er Chelsky komið inn og mun ekki gefa neitt. Þegar þessi lið mætast í hreinum úrslitaleik á Brúnni mun Chelsky verja titilinn og hirða dolluna. Ég hef haldið því fram í allan vetur að mínir menn séu alls ekki nógu stöðugir til að verða Englandsmeistarar. Ég spái því að þeir Chelsky menn muni síðan rassskella mína menn enn frekar og sigra á Wembley í vor og fari svo að þessi lið mætist líka í úrslitum meistaradeildarinnar þá spái ég því að Chelsky muni fullkomna auðmýkinguna yfir sýningargripum Fergusons gamla þeim Ronaldo og Roonie og hýða þá báða á bert rassgatið. Ég hef ekki farið dult með skoðun mína á töframanninum Ronaldo í vetur þegar allir eru að míga á sig af hrifningu yfir honum. Víst er að drengurinn er snillingur með boltann og hefur sýnt það að þegar sá gállinn er á honum getur hann tekið af skarið og rústað vörnum andstæðinganna og unnið leiki á eigin spýtur og þá eiga þeir ekkert svar annað en að brjóta á honum og sparka hann niður. Hann á það bara líka til að taka heilu leikina undir til að leika fyrir sjálfan sig og þá er hann ekki að leika fyrir liðið Man.Utd. heldur fyrir félagið Ronaldo Ltd. Þá sjáum við hann leika sig út í horn umkringdan andstæðingum og þegar hann kemst ekki út þá leggst hann bara niður, sest síðan upp á rassinn flötum beinum eins og krakki, grípur um höfuðið, horfir á dómarann og fórnar svo höndum í örvinglan þegar hann fær ekkert hjá dómaranum. Hversu oft höfum við ekki séð þessa senu í vetur? Þessa takta hjá snillingnum þoli ég ekki. Þó að ég sé Man.Utd. fan er ég ekki svo blindur að ég sjái ekki í gegnum þennan leikaraskap hjá þessum annars frábæra leikmanni. Þetta er einfaldlega óheiðarlegt og óþolandi, að vera sífellt að reyna að fiska í gruggugu vatni. Svona fannst mér Nistelroy lika vera, alltaf eins og á brauðfótum ef einhver kom nálægt honum. Þeir eru hinsvegar ekkert einir um þetta í Enska. Drogba hjá Chelsky er sennilega sá sem á metið í þessu í vetur. Þvílíkir brauðfætur hafa ekki lengi sést þar. Það má vonarstjarnan Roonie þó eiga að hann brýst áfram svo lengi sem stætt er og leggst ekki niður fyrr en í fulla hnefana. Engir brauðfætur þar. Glerharður nagli og skaphundur sem ekki hefur náð að sýna sitt rétta andlit ennþá. Er þó aðeins marki á eftir Ronaldo er það ekki? Á mikið inni og á eftir að springa út og verða yfirburðamaður í enska boltanum þegar hann nær meiri yfirvegun í sinn leik og betri stjórn á skapinu. Minnir mig oft á snillinginn Cantona, sterkur, flinkur, skapheitur og marksækinn. En... ég spái því að mínir menn hafi nú tapað stríðinu. Þeir hafa verið að vinna hinar ýmsu orrustur vetrarins, en... stríðinu sjálfu hafa þeir nú tapað með því að hleypa andstæðingnum inn um bakdyrnar. Leik eins og leikinn var á Old Trafford í dag eiga þeir einfaldlega að vinna örugglega ef þeir ætla sér að verða meistarar. Málið er að þá virðist skorta viljann til að vinna. Ná sér á strik annað slagið en detta síðan niður á mjög lágt plan þess á milli og eru þá eins og Íslenska landsliðið á góðum degi, eins og höfuðlaus her sem veit ekki hvort hann er að fara í stríð eða koma úr því. Hafa eins og ég sagði alls ekki verið sannfærandi í vetur. Og hana nú, hafið það til að hugsa um United menn.Eru þeir nógu sterkir til að standast álagið á síðustu metrunum? Mér sýnist ekki og að sprungur séu að myndast í múrnum. Foringinn hefur líka sagt að nú hafi Chelsky fengið ókeypis boðsmiða að háborðinu og verði boðið upp í lokadansinn. Megi sá besti sigra. Fjölþjóðlegt lið Man. United undir stjórn gamla refsins frá Skotlandi gegn fjölþjóðlegu liði Chelsky undir stjórn hrokafulls Portúgala leika til úrslita í Englandi bæði í deild og bikar. England hvað? 

Middlesbrough náði jöfnu á Old Trafford